Një person i maskuar me kapuç ka grabitur sot një filial të Postës Shqiptare në Kamëz. Burimet bëjnë me dije se grabitësi ka qenë i pajisur me një pistoletë lodër, ku është futur në postë dhe i ka marrë sportelistes rreth 1 milionë lekë të vjetra. Në vendngjarje kanë mbërritur shërbimet e policisë, që kanë nisur krehjen e zonës. Gjithashtu, po kqyren kamerat e sigurisë, për të bërë të mundur kapjen dhe identifikimin e autorit. Ngjarja ka ndodhur këtë të hënë rreth orës 14:20, në Kamëz, ku një person që mbante kapuç në kokë ka kryer grabitjen në Postë.
Njoftimi i Policisë:
Tiranë/Informacion paraprak
Më datë 18.04.2022, rreth orës 14:20, në Kamzë, një person ende i paidentifikuar, i maskuar me kapuç dhe mbante një send të dyshuar si pistoletë, është futur në filialin e Postës Shqiptare, ka marrë një shumë parash dhe është larguar. Grupi hetimor ndodhet në vendngjarje dhe po punon për identifikimin dhe kapjen e autorit. Shërbimet e Policisë po krehin zonën, për të bërë të mundur kapjen e tij.
