Tashmë janë zbardhur pamjet e ndjekjes së dy gomoneve në ujërat greke, nga operacioni i zhvilluar një ditë më parë. Nga pamjet e publikuara në mediat greke duket skafisti i cili manovron në det si profesionist.
Nga operacioni i djeshëm i policisë greke fillimisht u raportuan se ishin dy shqiptarë që ishin prangosur, dhe personi i tretë ishte italian. Mediat greke sqarojnë se të tre trafikantët e arrestuar janë nga Shqipëria, ndërsa identiteti i tyre ende nuk dihet.
Rezistenca e shqiptarëve mori fund pasi u ndoqën dhe u rrethuan nga anijet greke dhe të FRONTEX në detin Egje, së bashku me një helikopter. Në momentin që u rrethuan, skafistët u dorëzuan duke ngritur duart.
Gomonet u pikasën ditën e djeshme fillimisht nga rojet bregdetare turke, të cilët i kanë ndjekur nga pas, por pa sukses. Në ndihmë të tyre erdhën edhe 10 anije greke, një avion dhe një helikopter i FRONTEX, të cilët bënë të mundur kapjen e njërës prej tyre.
