Për të mos qenë të papërgatitur pas lëkundjeve sizmike, Emergjencat Civile kanë dhënë udhëzimet bazë. Nëse jeni të kujdesshëm, atëherë këto këshilla do iu shpëtojnë jetën.
Tërmetet që ranë sot, shkaktuan panik në tërë vendin, duke detyruar njerëzit që të linin zyrat apo banesat ku ata ndodheshin. Pavarësisht se një fenomen i tillë është i pamundur të parashikohet apo parandalohet, mënyrat se si mund të shmangësh një rrezik të mundshëm ekzistojnë. Asgjë nuk është e pamundur nëse tregoheni vigjilentë dhe zbatoni në përpikmëri këto këshilla bazike.
Si duhet të veprojmë gjatë kohës kur bie tërmet?
Sipas ekspertëve, do të jeni të sigurt nga tërmetet nëse merrni këto hapa themelorë:
Nëse gjendeni në një vend të mbyllur, shkoni menjëherë poshtë traut të banesës, në kasën e dyerve ose pranë një muri mbajtës
Duhet të kini kujdes nga gjërat që mund t’ju godasin, si xhama, mobilie, etj
Kini kujdes në përdorimin e shkallëve. Shpesh herë janë pak rezistente dhe mund të dëmtohen
Është mirë të shmangni përdorimin e ashensorit. Mund të bllokohet, ose të jetë dëmtuar
Kini kujdes nga pasoja të tjera nga tërmeti, si shembjet e urave, rrëshqitjet dhe rrjedhjet e gazit
Nëse jeni në ambient të hapur, largohuni nga ndërtesat e larta, pemët, shtyllat elektrike, pasi mund të goditeni nga materiale të ndryshme
