Përjashtimi i familjeve shqiptare nga skema e ndihmës ekonomike, rezulton se nuk është bërë mbi përllogaritje objektive. Shumë familje të varfra janë përjashtuar nga përkrahja sociale, me pretendimin se familjet në fjalë, nuk dua të punojnë.
Deklarata të tilla ka bërë vetë kryeministri Rama, por ndërkohë të dhënat e publikua nga Banka Botërore flasin se kjo strategji i ka përjashtuar nga skema shumë familje, që jetojnë në kushte shumë të vështira.
Banka Botërore deklaron se 70 për qind e familjeve më të varfra në Shqipëri janë të përjashtuara nga ndihma ekonomike. Të dhënat janë bërë publike në një raport auditimi mbi projektin e modernizimit të asistencës sociale. Raporti ka analizuar familjet që përbëjnë 10 përqindëshin më të varfër të popullsisë, ose 75 mijë familjet më të varfra të vendit. Sipas tij, vetëm një e treta e tyre janë të mbuluara nga ndihma ekonomike, ndërsa pjesa tjetër jo.
Kjo do të thotë se, nga 75 mijë familjet më të varfra të vendit, vetëm 22 mijë prej tyre marrin ndihmë ekonomike, ndërkohë që 53 mijë familje të tjera nuk përfitojnë.
Skema e ndihmës ekonomike në Shqipëri ka qenë historikisht e denatyruar, duke mos shkuar te më të varfrit. Në vitin 2012, qeveria e atëhershme dhe Banka Botërore nisën një program të posaçëm për modernizmin e skemës. Programi, i cili përfundon në dhjetor të këtij viti, parashikon një sistem të ri për përcaktimin e familjeve që trajtohen me ndihmë-shkruan TCh.
Në dy muajt e parë të këtij viti, përmes këtij sistemi, qeveria ka hequr ndihmën ekonomike për mbi 20 mijë familje. Por, kjo ka shkaktuar përplasje të forta politike.
Opozita ka akuzuar qeverinë se po përjashton nga ndihma familjet që jetojnë në mjerim, ndërkohë që rrit shpenzimet për luksin e zyrtarëve. Vet kryetari i Partisë Demokratike, Lulzim Basha ka vizituar disa prej familjeve të përjashtuara, duke i bërë thirrje qeverisë të rikthejë ato urgjentisht në skemën e ndihmës ekonomike.
