Nga: Klodian Tomorri
Shqipëria është zyrtarisht ekonomia me anemike e rajonit. Sipas Bankës Botërore, Prodhimi i Përgjithshëm Kombëtar pritet qe ketë vit te rritet me vetëm 2.9 për qind.
Te gjitha ekonomitë e tjera te rajonit do te kenë një rritje më të larte, duke e lëne Shqipërinë ne fund. Dhe, përveç Kosovës, këto janë te gjitha vende qe kane një standard me te larte jetese se Shqipëria, i cili do te thellohet me tej.
Kjo është hera e pare nga viti 2015 qe rritja ekonomike bie nen 3 për qind. Vendi po ecën mbrapsht. Po çfarë po ndodh me ekonominë?
Shkaku me te cilin justifikohet ngadalësimi i fortë i ekonomisë ketë vit, është kriza energjetike. Por kjo nuk është thjesht një loje numrash.
Shqipëria përjetoi krize energjetike edhe ne vitin 2017, por kurba e rritjes ekonomike, nuk ndryshoi krah. Përkundrazi vazhdoi te forcohej, nga 3.3 për qind qe ishte ne 2016-en ne 3.8 për qind.
Ndaj ka diçka tjetër qe po e frenon ekonominë. Dhe pergjigjia jane reformat. Ekonomitë e vogla dhe te hapura si Shqipëria kane vetëm një rruge për t’u zhvilluar shpejt; te bëjnë reforma agresive. Por vitet e fundit te gjitha reformat kane ngelur ne vend, e madje ne sektorë te caktuar si energjia janë përmbysur.
Shumica e politika e ekonomike orientohen vetëm për te kënaqur interesa te ngushta. Pjesa me e madhe e ligjeve qe shkojnë ne Parlament, kane emër te veçante nga pas. Ne fushën e prokurimeve, koncesionet dhe korrupsioni kane zhdukur garën. Praktikisht qeveria është bere arbitri qe shpërndan fitimet dhe dikton se si shpërndahet mirëqenia ne ekonomi. Por jo ne interes te publikut.
Nje qeveri qe nuk beson tek reformat, por hyn ne biznesin e piste te ligjeve speciale me përfitues te veçante, e ka mbaruar misionin e saj dhe sa me shume qëndron ne pushtet, aq me shume dëme shkakton. Ekonomia po i jep mesazhet. Pjesa tjetër i takon votuesve.
