Vdekja e 32-vjeçarit Lear Kurti është veshur me mister, për shkak se asnjë prej institucioneve, Policia dhe Spitali i Traumës nuk pranojnë që ai ka ndërruar jetë brenda ambienteve të tyre.
Eksperti i kriminalistikës Ervin Karamuço uron që ngjarja të mos jetë një skenar i përsëritur, duke sjellë kështu në kujtesë vrasjen e Klodian Rashës.
“Uroj mos jemi përpara një ngjarje Rasha 2”, tha Karamuço për Gazetën Shqip.
Ndër të tjera, Ervin Karamuço shprehet që të drejtat e njeriut fillojnë pikërisht aty ku mbaron forca e ligjshme e përshkallëzuar, pas prangosjes së personit, e sipas tij me këtë gjë duhet bërë një punë trajnuese shumë e madhe në rradhët e policisë.
“Rregulli i artë për të cilët duhet bërë shumë punë trajnuese në vazhdim me policinë është që me prangosjen e personit, mbaron forca e ligjshme e përshkallëzuar. Nga ai moment fillojnë të drejtat e njeriut”, shprehet eksperti.
Tashmë ka përfunduar ekspertiza mjeko-ligjore e trupit të pajetë të 32-vjeçarit Lear Kurti, i cili ndërroi jetë në komisariatin nr.3 në Tiranë, në rrethana ende të paqarta. Ngjarja ndodhi pak para mesnate.
Familjarët kanë tërhequr trupin e pajetë të të riut. Ndërkohë, po sot do të bëhet ceremonia mortore e të riut, i cili do të përcillet pasditen e sotme drejt banesës së fundit.
