Sapo është ndërprerë seanca te Krimet e Rënda në ngarkim të ish-ministrit të Brendshëm Saimir Tahiri dhe ish-zyrtarit të lartë të policisë në Vlorë, Jaeld Çela. “Balkanweb” raporton se në dosjen për ish-ministrin Tahiri dhe ish-kryepolicin e Vlorës mungojnë disa nga provat kryesore.
Thuhet se në hyrje të seancës, gjykatësi i çështjes, Ardit Mustafaj, bëri disa saktësime që lidhen me disa prova, që citoi gjatë mbrojtjes ish-ministri Tahiri, duke thënë se ka informuar për çështjen e radarëve me gjashtë shkresa ministren e Mbrojtjes të asaj kohe, Mimi Kodhelin, por rezultoi se asnjëra nga këto shkresa nuk janë depozituar nga ish-ministri Tahiri dhe nuk janë sekuestruar nga Prokuroria.
Nga ana e tij, Tahiri ka deklaruar se nuk i ka kërkuar këto si prova, por iu është referuar atyre për të konfirmuar personalitetin e tij. Si provë në dosje mungon edhe një e-mail i pretenduar nga Tahiri, që njëri nga zyrtarët e Policisë së Vlorës i ka dërguar njërit nga prokurorëve të çështjes, duke i informuar mbi grupin kriminal “Habilaj”, si trafikantë droge, për të justifikuar në këtë mënyrë faktin që i ka denoncuar “Habilajt” kur ka qenë ministër i Brendshëm.
Edhe ky e-mail nuk rezulton të jetë provë në dosjen gjyqësore ndaj ish-ministrit të Brendshëm dhe ish-drejtorit të Policisë së Vlorës.
Gjithashtu, mungojnë edhe prova të tjera, që Tahiri i cilësoi si prova kyçe për të provuar pafajësinë e tij, siç ishte libri i hyrje-daljeve në Ministrinë e Brendshme, ku ka dyshime se ka pasur takim mes Tahirit dhe njërit prej pjesëtarëve të grupit “Habilaj”. Për afro 30 minuta, avokatët e Jaeld Çelës kanë paraqitur të gjitha argumentet e mbrojtjes, ku sipas tyre, ai ka pasur sukses në luftën kundër trafikut të drogës, gjatë kohës kur drejtonte Policinë e Vlorës.
Gjykata pritet të japë sot verdiktin final për ish-ministrin e Brendshëm. Ai akuzohet nga Prokuroria për “Korrupsion të zyrtarëve të lartë”, “Trafik të lëndëve narkotike kryer në bashkëpunim” dhe “Grup të strukturuar kriminal”, në kuadër të dosjes “Habilaj”.
