Ministrja e Jashtme Olta Xhaçka ka deklaruar se vendimi për të shkëputur marrëdhëniet diplomatike me Iranin ishte drastik, por sulmi ishte i paprovokuar. Xhaçka tha se Shqipëria është konsultuar me aleatët e NATO-s si dhe partnerët Europian. Ministja shtoi se kanë kërkuar mbështetje për vendimmarrjen e Shqipërisë dhe për të ardhmen për të adresuar këto lloj kërcënimesh sa më mirë. Shqipëria prishi marrëdhëniet diplomatike me Iranin. Mesditën e sotme, kryeministri Edi Rama pohoi se ka prova të pakundërshtueshme se Irani ka financuar sulmin kibernetik ndaj shërbimeve online. Këshilli i Ministrave ka miratuar vendimin për ndërprerjen e menjëhershme të marrëdhënieve diplomatike me Iranin, ndërsa trupi diplomatik ka kohë 24 orë për t’u larguar nga Shqipëria.
“Shqipëria ka ndërprerë sot marrëdhëniet diplomatike me Republikën Islamike të Iranit, si një kundërpërgjigje ndaj sulmit kibernetik që ndodhi në korrik. Ishte një sulm i paprovokuar, pa asnjë shkak kundër një vendi anëtar të NATO-s, si dhe kandidat në BE.
Ky përbën një hap drastik, por për fat të keq agresivitetin e sulmit dhe faktin që ky sulm ishte i paprovokuar nuk linte hapësirë për asnjë vendim tjetër. Jemi konsultuar me aleatët në NATO, si partnerët Europianë. U kemi kërkuar mbështetje për vendimmarrjen e Shqipërisë dhe për të ardhmen për të adresuar këto lloj kërcënimesh sa më mirë”, tha Xhaçka.
