Kryetari Lulzim Basha, gjatë mbledhjes së grupit parlamentar të PD-së, ka realizuar dhe një video-konferencë me Presidentin e Partive Popullore Europiane, Jozef Daul, gjithashtu me McAllister e Hahn.
Sipas burimeve mësohet se Daul, McAllister dhe Hahn i kërkojnë PD të rikthehen në tryezën e negociatave dhe të futen në zgjedhje, ndërsa i kanë përsëritur edhe njëherë ofertën e 25 Prillit, që Basha refuzoi.
Apeli i sotëm duket se do të jetë i fundit nga ndërkombëtarët për Bashën, pasi komisioneri Johannes Hahn ia ka bërë mëse të qartë kreut të PD se edhe nëse nuk do të marrin pjesë në procesin e 18 qershorit, zgjedhjet do të njihen nga Brukseli.
Ofertën e ndërkombëtarëve e ka mbështetur edhe një nga kritiket e Bashës, Jozefina Topalli, e cila mësohet se është shprehur “Daul, Hahn dhe McAllister duan të na ndihmojnë, të gjejmë një zgjidhje”.
Ndërkombëtarët theksojnë se çdo gjë tjetër nuk është opsion, është e papranueshme për ata. Zgjedhjet do të njihen, pavarësisht vendimit tuaj për të marrë pjesë apo jo, mësohet të ketë thënë Hahn. Ky i fundit ka garantuar se ODIHR dhe Këshilli i Evropës do të monitorojnë zgjedhjet dhe fushatën zgjedhore.
Mbledhja e grupit erdhi pas kritikave të një dite më parë të tre deputetëve, Eduard Selami, Majlinda Bregu dhe Jozefina Topalli, se Basha kishte shmangur diskutimet dhe konsultat me forumet drejtuese të PD-së, sa i takon vendimit për bojkotin e zgjedhjeve parlamentare.
