Nënkryetari i Parlamentit të Malit të Zi, Genci Nimanbegu thekson se Rusia po vijon të ushtrojë ndikimin e saj në rajonin e Ballkanit, duke kërkuar që të shfrytëzojë konfliktet e ngrira.
Duke iu referuar ndërhyrjes ruse në ditën e zgjedhjeve parlamentare të Malit të Zi dhe tentativës së Moskës të vrarë ish-kryeministrin Milo Gjukanoviç, Nimanbegu vuri në dukje se ndërhyrja e Moskës është konfirmuar edhe nga partnerët ndërkombëtarë.
Kjo sjellje e Kremlinit, sipas nënkryetarit të Parlamentit të Malit të Zi, është vërtetuar edhe në vende të tjera, ku Shtetet e Bashkuara vijojnë ende hetimet mbi ndërhyrjen ruse në zgjedhje. Ndërsa në rajonin e Ballkanit, Rusia kërkon të shfrytëzojë konfliktet e ngrira, dhe gjendjen aktuale politike, ku më delikatja është ajo midis Kosovës dhe Serbisë.
Për këtë arsye, Nimanbegu në një intervistë për “Zërin e Amerikës” e cilëson sjelljen e Rusisë si një lojë shahu, me anë të së cilës Moska kërkon t’i japë formë rajonit të Ballkanit sipas interesave të saj.
“Ndërhyrja në situatën parazgjedhore si duket janë të dëshmuara edhe nga shtete të tjera jo vetëm nga strukturat e Malit të Zi. Bile, informacionet e Malit të Zi se Rusia ka bërë ndërhyrje nuk janë burimore nga strukturat e shtetit, por nga partnerët ndërkombëtarë. Rusia sigurisht synoi interesat e veta strategjike. Ajo do të luajë një lojë shahu, ku disa hapa të tyre do të japin profil për ato në segmente të tjera. Mos harroni se ka shumë konflikte të ngrira të cilat janë aktuale”, shprehet Nënkryetari i Parlamentit të Malit të Zi, Genci Nimanbegu.
