Lakers ka pësuar humbjen e dytë radhazi në NBA, këtë herë ndaj Houston Rocket me rezultatin 115-124 në Los Angeles. Miqtë regjistruan fitoren e parë këtë sezon por që u shoqërua me përplasje të dhunshme në tapet.
James Harden shkëlqeu me 36 pikë, ndërsa pas tij erdhi Chris Paul me 28 pikë dhe 10 asist. Për Lakers më i miri ishte LeBron James me 24 pikë, kurse 7 lojtarë të ekipit pritës realizuan nga 10 pikë, por në fund triumfuan miqtë.
Episodi i shëmtuar u regjistrua 5 minuta para fundit, ndeshja ishte me rezultatin 108-109, por Brandon Ingram duket se nuk e mbajnë me nervat dhe shtyn Harden, po në atë amulli të krijuar Rondo kap për hunde Paul, i cili ia kthen me një grusht drejt e në fytyrë, në sherr rikthehet edhe Ingram që lëshon grushte kush i del para.
Në ndeshjet e tjera, Portland mori fitoren e dytë sezonale pasi mundi 121-108 San Antonio. Kanadezët e Toronto nuk u ndalen sërish, pasi korrën edhe fitoren e tretë radhazi në fushën e Washington 113-117. NBA – Rezultatet e sotme:
- Indiana – Brooklyn, 132-112
- Washington – Toronto, 113-117
- New York – Boston, 101-103
- Philadelphia – Orlando, 116-115
- Chicago – Detroit, 116-118
- Miami – Charlotte, 112-113
- Dallas – Minnesota, 140-136
- Denver – Phoenix, 119-91
- Portland – San Antonio, 121-108
- Lakers – Houston, 115-124
