Opozitari rus, Alexei Navalny, ka kërkuar që t’i kthehen rrobat që kishte veshur, kur ra në koma muajin e kaluar.
Përmes një postimi në blogun e tij personal, Navalny akuzon Moskën për fshehjen e provave të helmimit. Ai thotë se i janë ndërruar rrobat përpara se të transferohej nga Siberia në Gjermani për trajtim mjekësor.
“Para se të më jepnin leje për t’u transportuar në Gjermani, ata më hoqën të gjitha rrobat dhe më dërguan lakuriq. Duke qenë se Novichok u gjet në trupin tim dhe ndotja për shkak të kontaktit është mjaft e mundshme, rrobat e mia janë një provë e rëndësishme”, shkruan ai.
Më tej, Navalny tërheq vëmendjen për faktin se afati për të kryer një “procedurë para-hetimor” në lidhje me çështjen e tij ka skaduar, pasi tashmë kanë kaluar 30 ditë nga dita kur ai u helmua. Navalny tregon se dy laboratorë të pavarur në Francë dhe Suedi, si dhe laboratori special i ushtrisë gjermane, kanë konfirmuar ekzistencën e Novichok në trupin e tij.
“Sidoqoftë, në realitetin politik dhe ligjor rus kjo nuk ekziston. Rusia nuk është ndjekur penalisht, por ekziston një procedurë paraprake për pranimin tim në spital. Kam përshtypjen se nuk kam rënë në koma kur isha në aeroplan”, përfundon ai.
