Juventusi ka mposhtur Napolin në “Allianz Stadium” dhe vazhdon të jetë i pandalshëm në Serie A, ku ka regjistruar 7 fitore në po aq ndeshje. Kanë mjaftuar dy gola të Mandzukic dhe një i Bonucci për ta bërë të pavlefshëm atë të Mertes, ndërsa Cristiano Ronaldo ishte fantastik ku ka dhuruare asiste. Bardhezintë vazhdojnë të kryesojnë të vetëm dhe duket se kanë fituar kapionatin akoma pa e filluar.
Të besuarit e Allegrit e nisin sfidën me shumë vendosmëri dhe hidhen në sulm që në minutat e para. Por miqtë kanë kaluar në avantazh pas vetëm 10 minutash lojë me Dries Mertens, duke përfituar nga një gabim i bërë nga Bonucci në mbrojtje. 16 minuta më vonë ka ardhur barazimi për torinezët, që kanë gjetur golin me Mario Mandzukic, i cili ka marrë një pasim perfekt nga Cristiano Ronaldo.
Edhe goli i dytë, ai i përmbysjes, ka ardhur nga një kombinim i dyshes CR7-“Super Mario”, por këtë herë ka qenë aksidental. Portugezi ka goditur shtyllën me një goditje nga jashtë zone dhe topi ka shkuar në këmbët e kroatit, i cili e ka dërguar në rrjetë me portën e boshatisur.
Nëntë minuta më vonë, Napoli ka mbetur me dhjetë lojtarë pas kartonit të dytë të verdhë të marrë nga Mario Rui. Juventus e ka patur më të lehtë të kontrollojë ndeshjen me një lojtar më shumë dhe në të 76-ën ka shënuar edhe golin e tretë me Bonucci-n, i cili ka shlyer gabimin e bërë në pjesën e parë.
Në të 83-ën ka qenë Ronaldo që ka shkuar shumë afër golit, por goditja e tij ka shkuar pak centimetra larg shtyllës së majtë. Kjo fitore 3-1 ka konfirmuar dominimin e bardhezinjve në Serinë A, që duket se edhe në këtë sezon do të ketë të njëjtin padron.
