Gjatë një udhëtimi historik në Tajvan të mërkurën, kryetarja e Dhomës së Përfaqësuesve të SHBA Nancy Pelosi tha se vizita e saj kishte për qëllim ta bënte “të qartë” se Shtetet e Bashkuara “nuk do ta braktisnin” ishullin e qeverisur në mënyrë demokratike.
Pelosi u largua nga Tajvani të mërkurën, rrugës për në kryeqytetin e Koresë së Jugut, Seul, pasi u bë kryetarja e parë e Dhomës së Përfaqësuesve në 25 vjet që viziton ishullin vetëqeverisës.
Lavdërimi i Pelosit për angazhimin e ishullit ndaj demokracisë ishte një shfaqje e rëndësishme e mbështetjes për Taipein, që erdhi vetëm disa orë pasi Kina kërcënoi se do të hakmerrej ndaj pranisë së saj me një seri stërvitjesh ushtarake, që Ministria e Mbrojtjes e Tajvanit e krahasoi me një “bllokadë detare dhe ajrore”.
Pekini kishte paralajmëruar në mënyrë të përsëritur, për pasoja të tmerrshme nëse udhëtimi ecën përpara – madje duke shkuar aq larg sa të paralajmëronte presidentin amerikan Joe Biden se ata që luanin me zjarrin do të “vdisnin” prej tij.
Por paralajmërimet nga Pekini, dhe madje edhe një sugjerim nga vetë Biden se ushtria amerikane mendonte se udhëtimi nuk ishte “një ide e mirë”, nuk e penguan Pelosin, 82 vjeç, të fluturonte në ishull së bashku me një delegacion të Kongresit të martën dhe të takohej me zyrtarët kryesorë të saj.
“Ne jemi krenarë për miqësinë tonë të qëndrueshme”, tha Pelosi, duke folur së bashku me presidentin e Tajvanit Tsai Ing-wen në zyrën presidenciale në Taipei.
Burimi i lajmit: CNN. Përshtatur nga Tirana Today