Naftëtarët e Ballshit do të marrin përsëri pagë nga buxheti i shtetit. Po kështu pritet të zgjerohet aksi Elbasan-Qafë Thanë. Lajmin e ka përcjellë Ministrja e Infrastrukturës dhe Energjisë, Belinda Balluku dje në Komisionin e Veprimtarisë Prodhuese. Ajo njoftoi se do të zgjerohet me një korsi aksi rrugor Elbasan-Qafë Thanë.
Balluku tha se projekti ka përfunduar, dhe sipas saj, brenda vitit 2022 do të nisë zgjerimi i rrugës. “Ne kemi një projekt për rrugë shpejtësie, Elbasan-Pogradec-Qafë Plloçë, problemi është kjo rrugë do të kërkonte më shumë se 5 vite. Për këtë arsye është vendosur që në çdo rast, rruga alternative për një rrugë kombëtare për të ardhmen është e domosdoshme. Ajo rrugë nuk mund të qëndrojë më në ato parametra, sepse është rrugë e rëndësishme dhe brenda vitit 2022 do të nisë zgjerimi i kësaj rruge. Projekti po përfundon, pasi ka pasur një studim fizibiliteti. Zgjerim segmenti deri në Qafë Thanë, si në Qafë Thanë që ka zgjerim 2 korsi + 1 shtesë”, u shpreh ministrja.
Ministrja Balluku trajtoi edhe rastin e naftëtarëve të Ballshit. Ajo dha lajmin e mirë se ata do të marrin përsëri pagë nga buxheti i vitit 2022. Balluku sqaroi se 830 naftëtarët në kushte të papunësisë, do të kompensohen me 300 milionë lekë. Sipas saj, për të gjithë naftëtarët që nuk do të rifillojnë punë në rafineri apo diku tjetër, Ministria e Infrastrukturës dhe Energjitikës do të marrë përsipër financimin në vitin 2023.
“Naftëtarët e Ballshit do të marrin përsëri pagë nga buxheti i shtetit në vitin që vjen. Të 830 naftëtarët në kushte të papunësisë, pasi nuk punon rafineria e Ballshit, do i kompensojë me 300 milionë lekë, paga do të jetë 30 mijë lekë.
Për të gjithë naftëtarët që nuk rifillojnë punë si në rafineri apo diku tjetër, ne si ministri do të marrim përsipër edhe financimin e tyre në vitin 2023”, tha Balluku.
