Ekspertët po studiojnë gjithnjë e më shumë mutacionin indian të koronavirusit “Delta”, pasi ka shkaktuar shqetësim jo vetëm në Evropë por në të gjithë botën, kryesisht për shkak të rritjes së transmetueshmërisë së tij.
Athanasios Exadaktylos, president i Komunitetit Mjekësor Grek, ka folur në televizionin “MEGA” në lidhje me normat e larta të transmetimit, duke theksuar nevojën për të përshpejtuar fushatën e vaksinimit, shkruan Protothema.
“Tek të sëmurët me grip, transmetimi është 1 në 1.1, domethënë dhjetë persona infektojnë 11 të tjerë. Në fazën e parë virusi ishte 1 në 4, një i infektuar ia transmetonte virusin katër të tjerëve dhe katër infektojnë 16. Në mutacionin britanik kishim 50% më shumë transmetueshmëri, domethënë një infekton 6 dhe 6 infektojnë 36. Në mutacionin “Delta” kemi 50% më shumë transmetueshmëri se mutacioni britanik. Një infekton nëntë, dhe nëntë infektojnë 81 “, tha Eksadaktylos.
Një valë e re në vjeshtë, fatale për ekonominë e Greqisë
Ministri i Zhvillimit dhe Investimeve të Greqisë, Adonis Georgadis u shpreh se nëse do të ketë një valë tjetër pandemie në vjeshtë, atëherë vendi do të shkojë drejt falimentimit.
Gjatë një diskutimi me disa përfaqësues të bizneseve, Georgadis iu tha atyre që të mos ankohen për qeverinë, por nënvizoi faktin që qytetarët duhet të vaksinohen masivisht, në mënyrë që jepet fund sa më shpejt pandemisë, shkruan Protothema.
“A doni që të mbyllemi sërish në dimër? Në rast të një mbylljeje tjetër nga pandemia do të na duhet të përballemi me faliment, pasi nuk kemi më para. Në vend që të ankoheni për qeverinë, thuajini artistëve që t’i bëjnë thirrje qytetarëve që të vaksinohen masivisht, në mënyrë që të mos jemi të detyruar që të mbyllemi gjatë dimrit”, tha ai.
Greqia u përball me një situatë të vështirë prej koronavirusit duke u detyruar që bizneset të qendrojnë mbyllur për disa muaj, ndërkohë që qeveria shpenzoi shuma të mëdha parash në formë subvencionesh për bizneset dhe individët e prekur prej masave të marra.
