Kryesia e PD-së përjashtoi nga radhët e saj deputetin Myslym Murrizi, i cili doli kundër vendimit për djegien e mandatit të deputetit. I pyetur nga ‘Opinion.al’, Murrizi tha se ky është një vendim që e priste, dhe nuk ishte i pari që ndërmerrej ndaj tij.
“Nuk është hera e parë që merret një vendim i tillë ndaj meje. Kjo është frymë e partisë të lidhur me Sigurimin, që sillen në këtë formë kur nuk u vjen pas avazit. Pse nuk u mor një vendim i tillë për Mesila Dodën dhe Shpëtim Idrizin, që morën votat e demokratëve në vitin 2013. Unë nuk pres tjetër vendim nga katër ish bij sekretarësh komunistë”, tha më tej ai.
I pyetur nëse do të jetë në Parlament në vazhdim, dhe në çfarë sigle, Murrizi tha se: “Unë do jem aty si përfaqësues i elektoratit tim dhe i studentëve të dhjetorit që u ngritën dhe thanë; e duam Shqipërinë si Evropa dhe Amerika”.
Deputeti Myslym Murrizi është shkarkuar nga çdo funksion, dhe nga anëtarësia për shkeljen e vendimit të grupit parlamentar, Kryesisë dhe Këshillit Kombëtar të PD, ndërsa tashmë do të jetë deputet i pavarur.
Vendimi në fjalë erdhi pasi deputeti Murrizi nuk iu bind urdhrit të kryetarit Basha, për të djegur mandatin e deputetit.
