Partia Demokratike vendosi të përjashtojë nga radhët e saj deputetin Myslym Murrizi, pasi ky i fundit nuk pranoi që ta dorëzonte mandatin e deputetit. Ai ka rrëfyer mbrëmjen e sotme se si u mor vendimi për djegien e mandateve, dhe se çfarë i tha Lulzim Bashës.
“Kam qenë i pranishëm në dy palë mbledhje në kolegjin e kryetarëve të partive në rrethe pas protestës. Kam kërkuar Bashës, dy vendime drastike e presin PD-në, marrëdhënia me Kuvendin dhe zgjedhjet lokale. Pasi edhe në 2015 na janë vjedhur zgjedhjet, por jo ti bashkisë ti pranosh dhe të parlamentit jo.
Unë i kam thënë nëse ke folur me aleatët. I thashë nëse nuk ke folur me ata matanë ujit, pasi kjo është vetëvrasje politike. Dhe ka folur, sa ke folur ti. I thashë fol me ata dhe na thuaj të shtunën. Por vendimi për djegien e mandateve më duket se ka qenë si vendim për ditë pushimi, pasi e mori të dielën.
Unë u surprizova. Në grupin e PD-së përveç meje ishin edhe 7-8 të tjerë kundër. Unë thashë argumentet pse jam kundër, i thash konsultohu me PPE-në të paktën. Berisha e pranoi, tha se ndërkombëtarët i kemi kundër, edhe unë i thash unë jam kundër”, tha ai.
Myslym Murrizi sulmoi Kryesinë e PD-së që mori vendim sot për ta përjashtuar nga partia, pasi nuk pranoi që të digjte mandatin.
“Po të jetë me lista të hapura, këta të Kryesisë së PD-së nuk i votojnë as për kryeplak, ua mbanë rrogën gruaja, nuk të paguajnë asnjë kafe, nuk i njeh njeri, nuk shkojnë një dasmë apo varrim. Nga ata që janë sot në Kryesi, 80% nuk kanë qenë në fushatë në 2017”, tha më tej ai.
