Liverpool është duke jetuar një ëndërr, pasi në një sezon që filloi pa pretendime, por fale treshes së sulmit, Mane-Firmino-Salah ka arritur në finalen e Champions League. Kjo treshe e sulmit është rikthyer të jetë e frikshme në Europë pasi ka thyer edhe një rekord të treshes së famshme BBC, të cilët kishin shënuar 28 gola, ndërsa yjet e “The Reds” kanë shënuar 29. Ndarja e golave në mënyrë pothuajse të barabartë tregon bashkëpunimin perfekt që ka mes tyre, ku Firmino dhe Salah kanë shënuar nga 10, ndërsa Mane 9.
Problemi më i madh është finalja e Champions League, pasi do të luhet në muajin e Ramazanit, i cili fillon më 15 maj dhe mbyllet më 14 qershor. Një shqetësim jo i vogël, duke menduar se ata nuk mund të stërviten dy herë në ditë, si janë planet taktike të prag finale. Atëherë, si mund të merret maksimumi nga Salah dhe Mane?!
Myftiu i Madh i Egjiptit, kryetari i islamit në vendin afrikan, deklaroi se futbollistët që do të marrin pjesë në Kupën e Botës do të ketë të drejtë të shkelin agjërimin në ditët e ndeshjeve të Kupës së Botës, sepse po bëjnë një tjetër sakrificë për kombin e tyre. Ata mund t’i rikuperojnë këto ditë në një moment tjetër të vitit.
Edhe udhëtarët, sipas rregullave, kanë të drejtë ta shkelin agjërimin gjatë kohës së udhëtimit dhe kjo është shpresa e vetme e Liverpool, që Salah dhe Mane të ushqehen gjatë rrugës për në Kiev. Por mbetet për t’u parë si e mendojnë dy sulmuesit. Salah e ka pasur gjithmonë një problem të tillë, duke kujtuar se te Chelsea bojkotoi një fazë përgatitore që përkoi me muajin e Ramazanit. Edhe Mane e ka nënvizuar disa herë rëndësinë e fesë në jetën dhe karrierën e tij. Të shohim se çfarë do të ndodhë, tifozët e Liverpool shpresojnë që urinë ta heqin duke u ngopur me gola të shënuar në Kiev…
