Gjatë 14 ditëve të protestës, Rama u kthye në specialist të rrjeteve sociale. Komentet e tij sa urdhëruese, dëshpëruese e qesharake u bënë virale. Rrjetet sociale shpërthyen, duke u marrë me komentet e tij. Por vetë Rama i kaloi me mjaft sportivitet, madje hera-herës qeshte me të madhe. Por edhe për këtë çështje ai e ka një koment.
“Mua të shkretin me keni bërë edhe instagramist, duke u munduar që të dialogojmë me ato format me shenja”. Ky ishte komenti i Ramës, para studentëve të Bujqësorit.
Rama tha se nëpërmjet dialogut do të dalë një dokument, që do të ketë një pjesë për të gjithë njëlloj, dhe një pjesë për çdo universitet me specifikat e veta.
“Nga ky proces, ne do të dalim me një dokument që do të ketë një pjesë për të gjithë njëlloj, dhe një pjesë universitet për universitet. Si u bëka plotësimi i ktyre pikave me megafon. Si të dal në ballkon t’i plotësoj, apo në instagram?
Rama iu rikthye edhe një herë dialogut. “Në instagram ua kam thënë ‘po’ për çdo pikë, qeveria e pranon sfidën për këto pika, se edhe mund të mos i pranonte fare e të thoshte vazhdoni rrini aty.
Plot qeveri e bëjnë, nuk dialogojnë fare. Kur qeveria thotë; jam shumë dakord që janë çështje të rëndësishme, ti thua jo nuk vij, plotësoji. Me shumë respekt kam frikë se shumë nga ata, nuk i dinë çfarë duan”, përfundoi Rama.
