Juventus arriti të marrë një fitore mjaft të rëndësishme të shtunën në mbrëmje, pasi përmbysi rezultatin me Bolognan dhe iu afrua titullit kampion. Por as kjo ndeshje e bardhezinjve nuk është mbyllur pa polemika edhe pse arbitrat mund të përdorin sistemin VAR në Serie A.
Ashtu si në ndeshjen ndaj Interit, edhe në takimin e djeshëm ishte sërish arbitri protagonist, duke ndikuar ndjeshëm në përmbysjen e rezultatit. Kështu moviola ka vlerësuar se gjyqtari Irrati, në bashkëpunim me VAR-in kanë gabuar në dy momente në favor të bardhezinjve, çka lehtësoi edhe përmbysjen e rezultatit.Rasti i parë ishte ai i minutës së 26′, kur Crisetig rrëmben një top dhe niset i vetëm drejt portës së Buffon, por Rugani shkakton faull me duar nga mbrapa. Pas një pauze të gjatë, Irrati akordon 11-metërsh dhe ndëshkon me karton të verdhë mbrojtësin e Juventusit, një vendim që nuk respekton aspak rregulloren. Futbollisti i Bolognës ishte nisur i vetëm përballë Buffon dhe Rugani si lojtar i fundit duhej ndëshkuar me karton të kuq. Por kjo situatë krijoi shumë panik pasi u deshën shumë minuta për tu vendosur edhe në VAR, ndërkohë që Irratit nuk i përgjigjeshin as skuiadra e arbitrave, nuk i jepnin shpjegim.
Një tjetër rast mjaft polemik, ku as Irrati dhe as VAR nuk arritën të marrin vendimin e duhur, ishte ai i momentit kur Khedira shënoi golin e avantazhit për bardhezinjtë. Mesfushori gjerman shtyn dukshëm futbollistin e Bolognës që kishte para vetes, duke mos i dhënë mundësi të kërcejë dhe të largojë topin, që më pas vetë Khedira e dërgoi në rrjetë. Protesta e emilianëve nuk vlejti as në këtë rast, që Irrati dhe VAR të rishikonin aksionin dhe të anulonin golin.Kështu pas një fitoreje tejet të kontestuar të shtunën e kaluar në ‘San Siro’, ku Orsato la Interin me 10 futbollistë që në minutën e 18′, ndërsa fali në dy raste të tjera Pjaniçin e Juventusit, edhe këtë të shtunë arbitrimi vendoset dukshëm në favor të bardhezinjve, duke u dhënë atyre një dorë drejt fitimit të titullit të 7 radhazi.