Asambleja e Përgjithshme e Kombeve të Bashkuara përmes një rezolute të veçantë caktoi 5 shtatorin, përvjetorin e vdekjes së Shën Nënë Terezës, si Ditën Ndërkombëtare të Bamirësisë. Dita Ndërkombëtare e Bamirësisë u krijua me qëllim të sensibilizimit dhe mobilizimit të njerëzve, OJQ-ve dhe palëve të interesuara në të gjithë botën për të ndihmuar të tjerët, përmes aktiviteteve vullnetare dhe filantropike.
Kjo ditë shënohet edhe në njohjen e rolit të bamirësve në lehtësimin e krizave humanitare dhe vuajtjeve njerëzore brenda dhe midis vendeve, si dhe të përpjekjeve të organizatave bamirëse dhe individëve, përfshirë edhe kontributin e jashtëzakonshëm të Shën Nënë Terezës.
U zgjodh pikërisht 5 shtatori, data e lindjes për qiell të Nënë Terezës, simbol i mëshirës së krishterë dhe Çmim Nobel për Paqen.
Dita e sotme është homazh i OKB-së për veprën e personalitetit të Nënë Terezës, që pasqyron bukurinë e bamirësisë e të varfërisë. Për t’u shprehur me fjalët e Shën Gjonit XXIII “bamirësia është një nga shtyllat e paqes!”.
5 Shtatori – Dita Ndërkombëtare e Bamirësisë
Sot përkujtojmë 5 Shtatorin – Ditën Ndërkombëtare të Bamirësisë, të shpallur si e tillë nga Organizata e Kombeve të Bashkuara, për nder të bijës më të njohur të Popullit Shqiptar Gonxhe Bojaxhiut – Nënës Terezë e cila ndëroi jetë më 05.09.1997.
Gjithë jetën ia dedikoi të varfërve të sëmurëve dhe njerëzve në nevojë. Asnjëherë nuk harroi rrënjët shqiptare.
“Me gjak, unë jam shqiptare.
Qytetare, jam e Indisë.
Për nga besimi, jam murgeshë katolike.
Sa u përket thirrjeve të mija, i takoj botës.
Sa i përket zemrës, i takojë tërësisht Jezuit”
Deklaratë e Gonxhe Bojaxhiut-Nëna Terezë, dhënë pas ndarjes së Çmimit Nobel në Oslo më 10.12.1979
Nënë Tereza, ikonë shqiptare e dashurisë së Zotit
Për Nёnё Terezёn, të varfërit nuk ishin vetëm miliona njerëzit, që kishin dhe kanë ende sot uri për bukë. Të varfërit ishin edhe miliona të përjashtuarit, të braktisurit, njerëzit pa familje, që kanë etje për dashuri, dinjitet, paqe, drejtësi e shpresë. Ky ishte mesazhi i vetëm i Nënë Terezës: t’u thoshte njerëzve, që vuajnë, se janë krijuar nga dora plot dashuri e Zotit, për të dashur e për t’u dashur!
