Në një takim të zhvilluar në Muzeun Kombëtar për të përndjekurit politik dhe të zhdukurit e diktaturës, kryetari i opozitës Lulzim Basha tha se nuk duhet të pritet drejtësi nga hetuesit e komunizmit.
“Mos e kërkoni drejtësinë nga Edi Rama, Fatmir Xhafaj dhe Gramoz Ruçi ata nuk mund të bëjnë drejtësi”.
Basha kërkoi ndjesë në emër të PD që opozita nuk ka përmbyllur me sukses gjetjen e eshtrave.
“Në emër të PD, ju kërkoj ndjesë për mosgjetjen e eshtrave. Ne nuk kemi arritur të përmbyllim me sukses këtë proces të nderimit dhe gjetjen e eshtrave të paraardhësve tuaj. Përgjegjësia ishte e PD dhe zotohem para jush se bashkë me ligjin që po hartojmë do e zgjidhim këtë çështje.”
Kryeopozitari, Basha tha se kjo nuk është një çështje vetëm e të përndjekurve, por një çështje e të gjithë shqiptarëve. Sot mungojnë mbi 4500 eshtra të të përndjekurve politikë.
“Sot mungojnë mbi 4500 shqiptarëve patriot, sepse eshtrat e tyre janë zhdukur nga diktatura dhe ekzekutorët komunistë.Sakri fica e shqiptarëve përkthehet në mijëra të ekzekutuar me gjyq dhe pa gjyq dhe qindra të burgosur e të internuar për fjalën e lirë, për besimin në Zot, për demokraci dhe për të ndërtuar një shoqëri të lirë. Krimi komunist shqiptar është krimi komunist më i rëndë në Europë, por akoma më e rëndë është mosgjetja e 4500 eshtrave”./
