Kryeministri Edi Rama, e ka bazuar fushatën e tij elektorale te procesi i vaksinimit kundër koronavirusit dhe rindërtimi, por jo vetëm.
Në çdo dalje të tij publike, ai nuk i kursen sulmet dhe ironitë ndaj kundërshtarëve politikë, e veçanërish kryetarit të Partisë Demokratike, Lulzim Basha.
Për kandidatin e PD-së në Durrës, Agim Baçi, kreu i qeverisë po i kërcënon shqiptarët me jetë për vaksinat.
Agim Baçi: PS ka qenë në opozitë këto vite si partitë e tjera. Rama ka zgjedhur një kastë personale që e ka quajtur Rilindje. Sot kemi një kastë drejtuesish kaq personale dhe kjo shpjegon dhe ligjërimin e zotit Ramës që kërcënon, vetëm shan, vetëm hakërrehet. Ka mbetur vetëm tu thotë shqiptarëve që nëse fiton opozita do të ndalohet dhe seksi pas 25 prillit, se vaksinat po, legalizimet po, rrogat po, ekonomia po. Ka mbetur tu thotë se nuk ka vetëm seks, familjet shqiptare do të vuajnë nga kjo gjë.
Ndryshe nga Rama, Baçi thotë se Basha nuk po merret me të por me programin dhe alternativën që ka për shqiptarët, si kryeministër i ardhshëm i tyre.
Agim Baçi: Me sa kam ndjekur fushatën në terren, PD dhe Basha nuk është marrë me zotin Rama.Është një strategji shumë e mirë. Ai që e sheh vetëvetën si kryeministër të ardhshëm të shqiptarëve duhet ti shpjegojë atyre se çfarë do të bëhet me ekonominë. Ka shumë pyetje si do të gjenden paratë? Nëse kthehet shteti ligjor, llogaridhënia, shpirti publik për të debatuar gjërat që na duhen bashkërisht unë them se çdo gjë është e mundur.
Ndër të tjera, Baçi pati dhe një apel për zgjedhësit shqiptarë që të mos shesin dinjitetin e tyre.
Baçi: Po i çove njerëzit te mbijetesa ata do të shkojnë te shitja e votës. Ju bëj thirrje të gjithë qytetarëve shqiptarë që të mos e shesin votën se po shite votë ke shitur dinjitetin, të ardhmen tënde, i ke hequr të drejtën vetes me kërku llogari, me pas dinjitet.
