Majlinda Andrea, gjyqtarja që mori ryshfet 50 mijë euro, është dënuar me 4 vjet burg. Gjykata e Lartë shpalli fajtore për korrupsion gjyqtaren, e cila mori mijëra euro për njohjen e një prone prej 40 hektarësh në Butrint.
Megjithatë, Andrea i ka shpëtuar burgut, pasi gjykata ka pezulluar vuajtjen e dënimit dhe ka caktuar shërbim prove për 3 vjet.
Gjykata vendosi sot edhe dënimin me 1 vit e 6 muaj burg per Odise Andrean, bashkëshortin e gjyqtares. Për të dy gjykata dha edhe një dënim plotësues, atë të heqjes së të drejtës së ushtrimit të detyrës për 5 vjet.
Gjykata vendosi edhe konfiskimin e 50 mijë eurove që janë sekuestruar burrit të gjyqtares.
Të akuzuar në këtë proces janë edhe Eleni Lino dhe Petraq Dashi. Sipas hetimeve të prokurorisë, Petraq Dashi ka nënshkruar një kontratë fiktive me të dyshuarit Ilia Çabiri dhe Eleni Lino, në bazë të të cilës ai deklaron se u huazon shumën prej 50 mijë euro.
