Nuk arrin të marrë më shumë se një barazim 1-1, Monaco në përballjen e vështirë që kishte në Turqi me kryesuesit e grupit Besiktas. Pas këtij barazimi francezët mbajnë vendin e fundit në gupe me vetëm dy pikë. Kjo situatë ia ka vështirësuar shumë punën për kualifikim më tej ekipit të principatës, që ta arrijë tani do të varet shumë edhe nga rezultati i sfidës tjetër mes Portos dhe Leipzig. Ku në rast barazimi mes dy ekipeve, Monaco do të vazhdojë të shpresojë kualifikimin dhe i duhet ti fitojë të dyja sfidat e mbetura.
Ndeshja e sotme ishte shumë e luftuar nga të dyja ekipet, ku Monaco u hodh në sulm që në startin e ndeshjes. Por ekipi turk ka një kontingjent lojtarësh që vështirë tu imponohet loja dhe këtë pjesë e vuajtën edhe francezët. Një zëvendësim i detyruar që në minutën e 26’ bëri që ata të humbitnin yllin e ekipit Lemar dhe në lojë u hodh fantazisti malazez, Jovetiç. Në momentin që u mendua se pjesa e parë u mbyll një gabim në mesfushë nga lojtarët e Besiktas, bëri që Lopes të përfitojë dhe të realizojë një gol mjaft të bukur. Pjesa e dytë nis me të njëjtin intensitet, por një shpërthim i Quaresmas dhe një lëvizje mjaft e bukur në zonë bëri që ai të fitonte një 11-metërsh. Ishte Tosun që e ekzekutoi dhe nuk gaboi por barazoi shifrat. Monaco hidhet në sulm me të gjitha armët, por Keita Balde dhe Jovetic janë të pafat dhe portieri Fabricio ishte në një natë mjaft të mirë. 1-1 ishte rezultati që u mbyll kjo sfidë dhe veniti shpresat që Monaco të jetë pjesë e më të mirëve në Europë edhe pas fazës së grupeve.
Presidenti i Turqisë, Recep Tayyip Erdogan ishte i pranishëm në stadiumin “Vodafone Arena”.
