Dy drejtues automjetesh kanë rënë në prangat e policisë së Tiranës, pasi tentuan të korruptonin efektivët e Policisë Rrugore. Bëhet fjalë për H.K., 43 vjeç, teksa po drejtonte makinën pa rripin e sigurimit, është përpjekur të largohet duke i ofruar agjentit të policisë një shumë parash.
Ndërsa, i arrestuari tjetër, 24-vjeçari K. C., u arrestua në rrugën Karl Topia, është konstatuar duke shkelur rregullat e qarkullimit për këmbësorë i ka ofruar efektivit të policisë një shumë parash.
Njoftimi i plotë:
Policia Rrugore e Tiranës godet dy raste të mitëdhënies
Në pranga dy drejtues mjetesh, të cilët për t’i shpëtuar masës administrative, tentuan të korruptonin punonjësit e Policisë Rrugore
Në funksion të patrullimeve me përzgjedhje, rrugorët e kryeqytetit kanë ndaluar në rrugën “Jordan Misja” drejtuesin e mjetit me iniciale H. K., 43vjeç, i cili po drejtonte mjetin pa vendosur rripin e sigurisë, dhe gjatë kontrollit policor, me qëllim shmangien e penalizimit, i ka ofruar agjentit verifikues një shumë lekësh.
Gjithashtu te sheshi “Karl Topia” është ndaluar drejtuesi i mjetit me iniciale K. C., 24 vjeç, i cili është konstatuar se nuk u jep përparësi këmbësorëve, drejtonte mjetin pa vendosur rripin e sigurisë, nuk kishte regjistruar ndryshimet e pronësisë në afat, dhe me qëllim shmangien e penalizimit, i ka ofruar agjentit verifikues një shumë lekësh.
Në të dy rastet efektivët e Policisë Rrugore kanë bërë arrestimin e dy drejtuesve të mjeteve në kushtet e flagrancës, për veprën penale “Korrupsioni aktiv ndaj personave që ushtrojnë funksione publike”, gjithashtu janë bërë procedurat administrative për kundravajtjet e konstatuara.
