Daily mail ka publikuar një video ku tregon se avioni ukrainas që u rrëzua në Teheran nuk është rrëzuar për shkak të defekteve të motorit, por është qëlluar nga raketat iraniane.
Më herët pas ngjarjes Irani refuzoi që të dorëzonte “Kutitë e Zeza” të cilat përmbajnë informacione për të zbardhur ngjarjen.
Dyshimet u shtuan dhe më shumë pas dëshmive të shumta okulare, të cilët kanë përshkruar që avioni ishte në flakë përpara se të rrëzohej në tokë. Kjo ka bërë që Ukraina të ndryshojë qëndrim dhe të ngrejë dyshime që avioni është goditur me raketa.
Nga ana tjetër, të tilla dyshime janë mbështetur dhe nga presidenti Trump dhe kryeministri kanadez Trudeau. Sipas tyre, kanë prova që avioni është goditur me raketa.
Videoja e fundit duket se tregon një raketë që goditi aeroplanin ndërsa fluturonte mbi Parand, zonë ku ndaloi së transmetuari sinjalin e tij para rrëzimit.
Një shpërthim i vogël ndodhi kur raketa goditi por avioni nuk shpërtheu. Ai vazhdoi të fluturonte për disa minuta dhe u kthye përsëri drejt aeroportit ndërsa u përfshi me flakë para se të shpërthente dhe të rrëzohej shpejt.
Televizioni iranian transmetoi pamjet sot, ndërsa një klip i veçantë 28 sekondash i marrë nga ndenjësja e përparme e një makine u shfaq për të konfirmuar se aeroplani tashmë ishte në flakë kur ra nga qielli nga 8,000 metra.
