Përfaqësuesja e lartë të Bashkimit Evropian për politikë të jashtme, Federica Mogherini dhe Eurokomisioneri Hahn, me anë të një deklarate të përbashkët, përshëndetën marrëveshjen e arritur mes dy liderëve politik, Rama e Basha, për tejkalimin e krizës dhe mbajtjen e zgjedhjeve gjithpërfshirëse.
Zyrtarët e BE-së e vlerësojnë këtë marrëveshje si një hap të parë thelbësor drejt integrimit, teksa vunë sërish në dukje se, vettingu mbetet pika kyçe për anëtarësimin e vendit në Bashkimin Evropian.
“Ky ishte një hap i parë thelbësor. Tani, kjo marrëveshje duhet të implementohet për të përgatitur zgjedhje me standarde ndërkombëtare. Duke qenë se vota në Parlament për ngritjen e organeve të vetting-ut është pjesë e marrëveshjes, ne përsërisim rëndësinë e një implementimi solid dhe të besueshëm të procesit të vetting-ut, që është kyç për progresin drejt anëtarësimit në BE. Ne do të vazhdojmë të mbështesim Shqipërinë dhe aspiratat legjitime të popullit të saj për një të ardhme më të mirë” thuhet në deklaratë.
Mogherini e Hahn përsëritën se do të vazhdojnë të mbështesin Shqipërinë në rrugën e proceseve integruese
