Përfaqësuesja e lartë e BE-së për politikë të jashtme dhe siguri, Federika Mogerini dhe ministri grek i punëve të jashtme Nikos Kosias kanë zhvilluar një takim, gjatë të cilit kanë folur për disa çështje. Mes tyre ishte Turqia, Qiproja dhe kontesti i emrit të Maqedonisë.
Takimi u zhvillua në Athinë, ku Mogerini theksoi rëndësinë e integrimit të rajonit të Ballkanit në familjen evropiane. Ajo shprehu besimin se në muajt e ardhshëm do të ketë më shumë mundësi dhe progres në bisedimet mes Athinës dhe Shkupit për kontestin e emrit.
Diplomati grek deklaroi se e mbështet integrimin e Maqedonisë në BE, por pasi të zgjidhet çështja e emrit kushtetues të Maqedonisë. Ai tha se, zgjidhja do të jetë më e lehtë në krahasim me të kaluarën, për shkak të ndryshimit të qeverisjes në këtë shtet.
