Modric i Artë me… polemikë! Kroati ka fituar çmimin më prestigjioz individual në botën e futbollit, pavarësisht humbjes së pësuar në finalen e Kupës së Botës. Megjithatë, rivalët e tij në garën për Topin e Artë nuk kanë qenë yjet e Francës kampione të botës, por Messi dhe Cristiano Ronaldo.
Dy fenomenet që monopolizuan futbollin botëror në dhjetë vitet e fundit. Por fundi i kësaj epoke nuk mund të mos shoqërohej pa disa polemika. Modric, në fakt, i ka dhënë domethënie të tjera çmimit të fituar të hënën në mbrëmje. Nuk ka fituar vetëm për veten. Ky duket se është mesazhi i dërguar nga kroati pas suksesit, siç ka bërë të ditur “AS”.
“Messi dhe Cristiano kanë ruajtur një nivel të çmendur në vitet e fundit, por ndoshta ka pasur disa lojtarë në të kaluarën që mund ta kishin fituar këtë trofe në vend të tyre. E kam fjalën për Xavi, Iniesta, Sneijder… Tani njerëzit duan që të fitojë dikush tjetër”, ka thënë Modric.
Një ndjenjë solidariteti që e lidh kroatin me dy spanjollët, të cilët mbetën duarbosh në 2010-ën pas triumfit në Kupën e Botës të luajtur në Afrikën e Jugut. A ka qenë ky revanshi i një brezi të tërë? Ndoshta po… “Besoj se ka qenë një fitore e futbollit, jam i lumtur që kam arritur ta fitoj këtë çmim. Ia dedikoj të gjithë atyre që e kanë merituar në të kaluarën, por nuk kanë arritur ta fitojnë”. Një mesazh i qartë për Messi-n dhe Cristiano Ronaldo-n.
