Pasi Luka Modric fitoi çmimin “Lojtari i Vitit” nga UEFA, plasi dhe një debat se ai nuk e kishte merituar dhe duhej që ta kishte marrë Ronaldo. Ylli portugez nuk ishte i pranishëm në ndarjen e çmimeve dhe kjo gjë krijoi më shumë polemika se kishte një hatërmbetje nga ana e Ronaldos.
Jorge Mendes, agjenti i futbollistit portugez, pasi klienti i tij nuk e fitoi atë çmim u shpreh se “ishte qesharake dhe e turpshme”. Raportet e përhapura kishin sugjeruar se pesë herë fituesi i “Topit të Artë” ishte i pakënaqur pas humbjes së çmimit, duke marrë parasysh golat dhe trofetë e tij me Real Madridin, sezonin e kaluar.
Por këto zëra i ka hedhur poshtë Luka Modric, pasi duke folur për mediat pas ndeshjes Kroaci-Portugali, e cila përfundoi 1-1 është shprehur se Ronaldo e kishte uruar atë privatisht dhe i kishte thënë se e ka merituar.
“Cristiano më dërgoi një mesazh, më përgëzoi dhe më tha se ishte i lumtur për mua dhe se e meritova çmimin, – tha Modric për RTP3, pas ndeshjes. – Ai, gjithashtu, tha se mezi pret për të më takuar përsëri”. Ronaldo nuk luajti në ndeshjen e së enjtes, pasi kërkoi leje të qëndrojë te Juventusi, ku e pret një sezon tepër impenjativ dhe është në kërkim të golit të parë bardhezi.
Dy yjet në fjalë janë vendosur të luftojnë për një tjetër çmim, teksa Ronaldo, Modric dhe Salah, gjithashtu, janë nominuar për “FIFA’s The Best Men’s Player of the Year“. Kroati shtoi: “Unë jam i lumtur që jam në një tjetër finale të madhe, do të shohim se çfarë do të ndodhë. Kam një marrëdhënie të mirë me Cristiano Ronaldon dhe do të vijojmë të jemi kështu edhe në të ardhmen. Çmimet individuale janë të rëndësishme, por unë nuk jam i fiksuar me to”.
