Artan Fuga/Fajtorët e vërtetë, por ata më përgjegjësit, për gjendjen e sotme janë konceptuesit në zanafillë të Kushtetutës që kemi, e cila ka pjellë degradimin politik, degjenerimin e sistemeve qeverisëse, autoritarizmin dhe përjashtimin e qytetarit nga çdo gjë.
Kur dikush prej tyre guxon të thotë sot në zjarrin prej kashte të betejave absurde brenda Partisë Demokratike se çdo kërkesë për ta ndryshuar këtë kuadër të degjeneruar kushtetues me një model tjetër, pra me një ‘‘Republikë të Re’’, të vërtetë, është ‘‘kërkesë marksiste’’, sikurse tha njeri prej tyre te emisioni i z. Ylli Rakipi, ‘‘Të Paekspozuarit’’, atëherë kupton se çfarë drame është jo vetëm gjendja e sotme e opozitës, partia Demokratike, por edhe se çfarë drame është kur përfaqësuesit ideologjikë dogmatikë që paraqiten si alternativë e drejtuesve të sotëm, janë në fakt jo vetëm të paditur në histori dhe në filozofi politike, por edhe sepse shumë prej tyre përfaqësojnë të shkuarën dhe stanjacionin e sotëm, ku deputeti si status nuk është veçse një shkrues; një skrib i vendimeve të qeverisë.
Çfarë beteje mes humbësve dhe humbësve; humbësve të 2017 dhe humbësve të 2013!
Ku ta dijë ai ‘‘antimarksisti’’ prej gjasme se modelet e demokracisë janë nga më i ulëti dhe i degjeneruari, te më i larti, dhe ku kalimi nga një model te tjetri është një nga vlerat e mëdha që na vjen qysh nga mendimi i Aristotelit, Makiavelit, Hobessit, e deri te mendimtarët dhe politikanët e sotëm.
Ku ta dijë ai se në historinë politike të demokracive të mëdha evropiane ka një evoluim disa shekullor të modeleve republikane! Republika të para, të dyta, të treta, të katërta, të pesta etj.
Ku ta njohë ai teknologjinë sociale që pasi e përdor një model, e konsumon atë, e hedh, dhe përqafon një model më të lartë.
Unë do t’i kisha vendosur katër në filozofi politike.
Nuk di elektorati demokrat me cilët humbës të bëhet!
Humbësit luftojnë me njëri-tjetrin se kush është më shumë humbës pa menduar se çfarë gjepurash nxjerrin nga goja.
(Shkëputur nga Facebook-u i akademikut Artan Fuga, titulli është i redaksisë)
