Ish-kryeministri Sali Berisha publikoi ditën e djeshme në “Facebook”-un e tij mesazhin e një qytetari digjital, ku hidhte akuza ndaj doktor Sami Agollit.
Qytetari shkruan se në spitalin e Përrenjasit kanë humbur jetën 2 persona, si pasojë e barnave të skaduara. Ndërsa shton se mjeku fajtor për këtë ngjarje ka qenë më parë kryetar i PS-së. Sipas mesazhit, familjarët kanë kërkuar ekspertizë, por “ndërhyrja e Taulant Ballës e ka bërë të vështirë”.
Lidhur me këto akuza, ka reaguar me anë të një statusi në “Facebook” edhe mjeku Sami Agolli, i cili shkruan se për trajtimin e bërë nga ana e tij, ka një kartelë ditore, e cila është në Prokurorinë Elbasan.
“Më vjen keq për zt Berisha të cilin e kam pasur dhe profesor që përcjell informacione të tilla. Ai nuk duhet ta ketë harruar dhimbjen e mjekut kur e humb pacientin e vet”, tha mes të tjerash Agolli.
Postimi i mjekut:
Përgjigje z. Sali Berisha.
Dhe një herë ngushëllime familjes Gega për ndarjen nga jeta të njeriut tyre të dashur. Isufi vdiq në Spitalin e Përrenjasit ne mesnatën e datës 12 shtator. Për trajtimin e bërë nga ana ime, ka një kartelë ditore, e cila është në prokurorinë Elbasan.
Është bërë autopsia dhe po bëhen ekzaminimet e ekspertiza mjeko-ligjore në Tiranë rezultatet e të cilës nuk kanë dalë akoma se zgjasin në kohë.
Nëse unë kam gabuar në trajtimin e bërë, do të mbaj përgjegjësinë e do pranoj dënimin që më takon.
Në mjekësi si në cdo fushë tjetër, punojnë mjekë, apo infermierë me bindje te ndryshme, po në raport me të sëmurët janë mjekë e infermierë. Secili bën punën e vet pa hijen apo mbrojtjen e askujt.
Secili punon për të mjekuar e shëruar të sëmurin e jo për t’i marrë jetën.
Më vjen keq për zt Berisha të cilin e kam pasur dhe profesor që përcjell informacione të tilla. Ai nuk duhet ta ketë harruar dhimbjen e mjekut kur e humb pacientin e vet.
Ngushëllime dhe ndjesë familjes Gega për këtë prononcim.
