Ne të gjithë besojmë se duhet të ushtrohemi fizikisht akoma më shumë. Atëherë pse është kaq e vështirë që ta arrijmë këtë gjë? Daniel Liberman, profesor i biologjisë evolucionare në Universitetin e Harvardit në SHBA,hedh poshtë mitet e zakonshme rreth stërvitjes:
Miti nr.1: Është normale që njerëzit të ushtrohen fizikisht
Në fakt stërvitja është një sjellje shumë moderne. Për miliona vjet, njerëzit ishin fizikisht aktivë për vetëm dy arsye:kur ishte e nevojshme ose e dobishme. Aktivitetet e nevojshme fizike përfshinin marrjen e ushqimit dhe bërjen e gjërave të tjera për të mbijetuar. Aktivitetet shpërblyese përfshinin lojërat, vallëzimet për t’u argëtuar ose për të zhvilluar aftësi. Por askush në epokën e gurit nuk vraponte për qejf për disa km apo të ngrinte pesha.
Miti nr.2: Shmangia e ushtrimeve do të thotë që ju jeni dembel
Sa herë që shoh shkallët lëvizëse pranë shkallëve të zakonshme, një zë i vogël në trurin tim më thotë: “Merr shkallët lëvizëse”. Edhe pse shkallët lëvizëse nuk ekzistonin dikur, ky instinkt është krejt normal, pasi aktiviteti fizik sjell humbjen e kalorive, të cilat deri vonë ishin gjithmonë në mungesë. Kur ushqimi është i kufizuar, çdo kalori e shpenzuar për aktivitet fizik është një kalori që nuk shpenzohet për funksione të tjera kritike si mirëmbajtja e trupit tonë, ruajtja e energjisë dhe riprodhimi.
Miti nr.3: Qëndrimi ulur të dëmton po aq sa edhe pirja e duhanit
Po, shumë pasivitet fizik është i pashëndetshëm, por le të mos ta demonizojmë një sjellje aq normale sa është qëndrimi ulur. Njerëzit në çdo kulturë rrinë shumë kohë ulur. Edhe njerëzit e egër, të cilët nuk kishin luksin të rehatoheshin, qëndronin ulur rreth 10 orë në ditë, po aq sa perëndimorët.
Por gjithnjë ka mënyra më pak të shëndetshme për t’u ulur. Studimet tregojnë se njerëzit që ulen në mënyrë aktive duke u ngritur çdo 10 ose 15 minuta e zgjojnë metabolizmin e tyre dhe gëzojnë shëndet më të mirë afatgjatë sesa ata që rrinë ulur për orë të tëra pa ndërprerje.
Miti nr.4: Paraardhësit tanë ishin punëtorë, të fortë dhe të shpejtë
Një mit i zakonshëm është se njerëzit ishin dikur atletë të pabesueshëm, super të fortë, super të shpejtë dhe të aftë për të vrapuar shumë gjatë. Nuk është e vërtetë. Shumica e njerëzve të egër ishin mjaftueshëm të aftë, por mesatarisht të fortë dhe jo veçanërisht të shpejtë.
Miti nr.5: Nuk mund të bini në peshë duke ecur
Deri vonë, pothuajse çdo program i rënies në peshë përfshinte ushtrimet fizike. E vërteta është se ju mund të bini më shumë në peshë përmes dietës ushqimor sesa ushtrimeve, sidomos ushtrimeve të moderuara, siç është150 minuta ecje e shpejtë nënë javë.
Miti nr.6: Vrapimi do t’iu dëmtojë gjunjët
Shumë njerëz kanë frikë nga vrapimi, pasi druhen se kjo do t’i shkatërrojë gjunjët. Këto shqetësime nuk janë tërësisht të pabazuara. Por gjunjët dhe nyjet e tjera nuk janë si amortizatorët e makinës që konsumohen nga përdorimi i tepërt. Përkundrazi, studime të shumë kanë treguar se vrapimi, ecja dhe aktivitete të tjera i mbajnë gjunjë më të shëndetshëm.
Miti nr.7: Është normale të jemi më pak aktivë kur plakemi
E vërteta është se ne kemi evoluar për të qenë gjyshër duke qenë aktivë, në mënyrë që të sigurojmë ushqim për fëmijët dhe nipërit tanë. Nga ana tjetër, qëndrimi fizikisht aktiv kur plakemi stimulon procese të panumërta të mirëmbajtjes në formë të trupit tonë.
Miti nr.8: Ekziston një normë e ushtrimeve optimale
Shumë profesionistë të shëndetësisë ndjekin rekomandimin e Organizatës Botërore të Shëndetit për të paktën 150 minuta në javë ushtrime të moderuara ose 75 minuta në javë stërvitje intensive.
Në fakt, kjo është një recetë arbitrare,pasi mundësia për t’u ushtruar varet nga dhjetëra faktorë si gjendja fizike, mosha, historia e dëmtimeve muskulore etj. Edhe vetëm 1 orë në javë (tetë minuta në ditë), mund të sjellë përfitime të konsiderueshme. Nëse mund të bëni më shumë, akoma më mirë, por nivele shumë intensive nuk ju japin përfitime shtesë.
Miti nr.9: Motoja “Thjesht bëje”nuk funksionon
Për të promovuar stërvitjen fizike, ne zakonisht e përshkruajmë atë dhe e shesim, por le të kujtojmë se si kemi evoluar që të jemi fizikisht aktivë për vetëm dy arsye:kur ishte e nevojshme apo e dobishme. Prandaj le të gjejmë mënyra për t’i bërë të dyja:ta bëjmë të domosdoshme dhe të dobishme.
Miti nr.10: Ushtrimi fizik është formula magjike për një shëndet të mirë
Le të mos e shesim stërvitjen fizike si ilaçin çudibërës. Në botën moderne perëndimore nuk ishte e mundur më që të ishim fizikisht aktivë, ndaj shpikëm ushtrimet fizike. Por ato nuk janë formula magjike që garanton shëndet të mirë. Fatmirësisht, vetëm një sasi e vogël ushtrimesh mund të ngadalësojë ritmin me të cilin plakemi, dhe të zvogëlojë ndjeshëm shanset për t’u prekur nga një gamë e gjerë sëmundjesh.
Burimi i lajmit: https://www.theguardian.com/lifeandstyle/2021/jun/06/just-dont-do-it-10-exercise-myths
Përshtatur nga TIRANA TODAY
