Vlerësimi i saktë i pasurisë së legjendës argjentinase, Diego Maradona, në momentin e vdekjes së tij, më 25 nëntor 2020 është ende i vështirë. Kërkimet e avokatëve mund të vazhdojnë për muaj të tërë.
Në shumë raste është e nevojshme edhe kërkesa për bashkëpunim të qeverive të huaja, siç ka ndodhur me autoritetet venezueliane dhe kubane, ku Maradona posedonte pasuri të paluajtshme dhe aksione në biznes te ndryshme, shkruan Ruetir.
Për momentin ka një shifër që parashikohet të mbërrijë në 500 milionë dollarë, por është ende e paplotësuar. Zbulimi i fundit janë dy kasafortat misterioze ende të kyçura që gjenden në Dubai dhe dy makina sportive, një Rolls Royce dhe një BMW me vlerë totale rreth 350 mijë dollarë.
“Brenda kasafortave mund të ketë gjithçka, askush nuk e di me saktësi. I vetmi në dijeni të tyre ishte Diego”, tregon një burim pranë familjarëve.
Përveç pasurive të paluajtshme, makinave të luksit, deri tani pesë llogarive bankare në vende të ndryshme, reliket, përfshirë kujtime me vlerë si letra e mikut të tij Fidel Kastro, kanë nisur dyshimet për manovrat e para që pretendentët e trashëgimisë kanë nisur të bëjnë.
