Pas mbledhjes së qeverisë, ministrja e Ekonomisë dhe Financave, Delina Ibrahimaj, njoftoi se është shqyrtuar projekt buxheti për vitin 2023. Gjatë këtij viti parashikohet që ekonomia shqiptare të rritet me një normë prej 2.6 % në terma realë dhe 5.7% në terma nominalë. Parashikohet që gjatë vitit të ardhshëm, inflacioni të fillojë të ngadalësohet duke arritur në një nivel mesatar prej 3.6%.
“Projektbuxheti do t’u prezantohet në detaje në javët në vijim për çfarë parashikon. Ky buxhet do të vijojë që të mbështesë energjinë elektrike, pra mos rritjen e çmimit për energjinë elektrike që mos të preken konsumatorët dhe bizneset e vogla”.
Për sa i përket amnistisë fiskale, Ibrahimaj bëri me dije se ende nuk ka një datë për miratimin e këtij ligji. “Amnistia fiskale është një ligj i veçantë, dhe nuk është parashikuar në projekt buxhetin që miratuam. Është ende në konsultim publik me partnerët ndërkombëtarë, dhe nuk kemi ende një datë për miratimin e këtij ligji. Roli i Presidentit të Republikës është që të thërrasë Komitetin e Sigurisë Kombëtare. Diskutuam për sigurinë kibernetike ku çdo institucion raportoi mbi masat e marra, nivelin e goditjes dhe masat që do të merren në vijim”.
