Kuvendi i Shqipërisë ka miratuar mbrëmë me 74 vota pro buxhetin e shtetit për vitin 2018. Por sa është shuma që parashikohet që të mblidhet në buxhet, sipas të dhënave zyrtare nga tabelat e projektbuxhetit 2018.
Si dhe sa janë taksat që pritet të paguajnë individët dhe bizneset për të siguruar 464 miliardë lekë, ose 3.3 miliardë lekë, sa është shuma që parashikohet të mblidhet në buxhet.
Sipas parashikimit të projektbuxhetit të vitit 2018, Tatimi mbi Vlerën e Shtuar (TVSH), një taksë që paguhet nga konsumatori në çmimin fundor të mallit ose shërbimit, është zëri që sjell më shumë të ardhura në buxhet, me 33.5 për qind të totalit. Shqipëria ka normën më të lartë të TVSH-së në rajon me 20%, së bashku me Serbinë. Si pasojë, nga TVSH-ja pritet që të arkëtohen rreth 1.1 miliard euro.
Ndërsa nga ana tjetër janë edhe sigurimet shoqërore dhe shëndetësore. Të dyja së bashku zënë 19.2 për qind të totalit të të ardhurave të pritshme, ose 544 milionë euro. Kategoria e tretë është akciza, ec ila siguron 9% të të ardhurave, e thënë ndryshe 364 milionë euro.
Nëpërmjet dy taksave mbi konsumin, akcizës dhe TVSH-së, që bizneset ia ngarkojnë konsumatorit final përmes çmimit, buxheti siguron rreth 45 për qind të të ardhurave. Me pak fjalë, nga produktet që do të blejnë, ose shërbimet që do të marrin, qytetarët do të paguajnë indirekt për shtetin rreth 1.5 miliardë euro.
Kategoria e katërt është taksa nacionale (renta), e cila është tatim mbi të ardhurat personale dhe tatimfitimi që sjellin përkatësisht rreth 8.5, 8.2 dhe 7.5 për qind të totalit.
Si tatim mbi të ardhurat personale, individët pritet të paguajnë 272 milionë euro, apo rreth 8.2% më shumë sesa pritet që të paguajnë këtë vit. Shqipëria mban rekord dhe për taksimin e individëve, sidomos atyre me paga të larta, raporton “Monitor”. Norma progresive prej 23%, për pagat mbi 130 mijë lekë (rreth 930 euro) është unike në gjithë rajonin, që i taton të ardhurat nga paga mesatarisht me 9-11%. Edhe tatimi nga të ardhurat e tjera (qiraja etj) është 15% për gjithë individët shqiptarë. Për krahasim, Mali i Zi, që paga të larta kategorizon ato mbi 720 euro neto, i taton me 11%, nga 9% që tatohen pagat nën këtë nivel. Serbia, të ardhurat nga punësimi dhe të ardhurat nga biznesi i taton me 10%, ndërsa të ardhurat nga copyright dhe të ardhurat nga qiraja 20%; të ardhurat nga kapitali 15%.
Ndërkohë në Maqedoni, tatimi mbi të ardhurat personale është i sheshtë prej 10%. Në Mal të Zi, tatimi mbi të ardhurat është 9% dhe rritet në 11% për të ardhurat prej më shumë se 720 euro neto/muaj nga punësimi. Kosova ka tatimin mbi pagën më të ulëtin në rajon, progresiv nga zero në 10 (0%/4%, 8%, /10%). Në Bosnjë-Hercegovinë, tatimi mbi të ardhurat është fiks, 10%.
Përmes TVSH-së e akcizës që janë taksa indirekte mbi konsumin dhe tatimit direkt mbi të ardhurat personale, individët do paguajnë gjithsej 1.7 miliardë euro, ose gjysmën e totalit të të ardhurave që pritet të mblidhen në buxhet. Në vitin 2018, bizneset do të paguajnë si tatim fitim rreth 250 milionë euro, çka nënkupton që fitimet e sipërmarrjeve vitin e ardhshëm pritet të jenë rreth 1.8 miliardë euro.
