Çdo ditë e më shumë po shpeshtohen thirrjet nga Ministria e Shëndetësisë, që qytetarët të vetëndërgjegjësohen, pasi COVID-19 nuk është zhdukur. Në njoftimin e radhës, Ministria e Shëndetësisë ka paralajmëruar të gjithë bizneset e hapura, që të respektojnë protokollet higjieno-sanitare.
Ministria bën me dije se po vazhdon monitorimi në terren, për parandalimin e COVID-19. Kërkohet ndërgjegjësim nga të gjithë, në mënyrë që rihapja graduale të jetë e suksesshme dhe të mos bëjmë hapa pas.
Në 24 orët e fundit vijon të jetë i lartë numri i rasteve te reja me koronavirus në Tiranë, ndërsa të gjithë zonat e tjera rezultojnë pa raste të reja. Janë testuar 262 qytetarë të dyshuar të prekur me COVID- 19, dhe janë konfirmuar 21 raste pozitive, të gjitha në Tiranë. Ndër rastet e reja janë 13 të prekur në QSUT, personel shëndetësor dhe pacientë, kontakte të një infermiere e cila rezultoi pozitive dy ditë më parë, e infektuar jashtë spitalit.
Njoftimi
Strukturat e Njësive Vendore të Kujdesit Shëndetësor po monitorojnë në terren bizneset dhe insitucionet për zbatimin e protokolleve të miratura nga ekspertë të Institutit të Shëndetit Publik për parandalimin e infeksionit të shkaktuar nga COVID-19, në kuadër të rihapjes graduale.
?Stafet e Njësive Vendore të Kujdesit Shëndetësor në të gjithë vendin po këshillojnë edhe qytetarët për zbatimin e distancimit social dhe atë të higjenës personale me qëllim mbrojten nga COVID-19.
?Duhet ndërgjegjësim nga të gjithë në mënyrë që rihapja graduale të jetë e suksesshme dhe të mos bëjmë hapa pas.
#Bashkë
