Ministria e Infrastrukturës dhe Energjisë ka dalë me një tjetër njoftim në lidhje me situatën e krijuar nga koronavirusi në vend.
Në njoftimin e shpërndarë, Ministria e Infrastrukturës i bën thirrje kompanive të transportit ndërkombëtar të mallrave, se duhet të dorëzojnë emrat e drejtuesve të automjeteve të cilët do të kryejnë transportin.
Në njoftim theksohet se emrat duhet të dorëzohen brenda ditës së sotme.
“Në kuadër të organizmit të transportit ndërkombëtar të mallrave, si pasojë e masave të marra për parandalimin e përhapjes së virusit COVID-19, kërkohet nga të gjitha kompanitë të cilat kryejnë transport ndërkombëtar të mallrave që brenda ditës së sotme, 14.03.2020, ora 23:00 të dorëzojnë në adresën e email transporti@infrastruktura.gov.al, listën e drejtuesve të automjeteve, të cilët kryejnë transport ndërkombëtar”, thuhet në njoftimin e shpërndarë.
Lista duhet të përmbajë emër, atësi, mbiemër, ditëlindje, numër pasaporte dhe numrin e lejes së drejtimit ndërkombëtare.
Nga ana e autoriteteve do të lejohen të qarkullojnë vetëm kompanitë të cilat do të dërgojnë emrat e drejtuesve të tyre.
