Analisti Fatos Lubonja ka komentuar zhvillimet e fundit politike në vend. I ftuar në rubrikën “Opinion” në studion e lajmeve në News 24, Lubonja komentoi edhe konferencën që pritet të ketë nesër Presidenti Meta, pasi Kolegji Zgjedhor vendosi të mos çregjistrojë nga gara zgjedhore PUK e Idajet Beqirit, duke mos e njohur kështu dekretin presidencial.
Analisti tha se Metën “po e ha ujku”, duke iu referuar përplasjes me mazhorancës, ndërsa shtoi se ka ardhur momenti që ai të lërë Presidencës dhe të marrë drejtimin e LSI-së.
“Presidentin është duke e ngrënë ujku. Rruga që duhet të ndjekë është ta lërë Presidencën të marrë LSI. Për mua s’ka rrugë tjetër. Duhet ballafaqim për t’i treguar këtyre që kanë forcën, prit njëherë se ka forcë edhe këtej”,– u shpreh Lubonja.
Sa për ndikimin që mund të kenë ndërkombëtarët, Lubonja i konsideroi ata më shumë pjesë të problemit se sa pjesë të zgjidhjes.
“Ndërkombëtarët janë pjesë e problemit, jo e zgjidhjes. Ata ishin me Berishën deri sa u dogj vendi, ata janë pjesë e problemit, duan stabilitet. Kanë harxhuar miliona me atë reformën në drejtësi, ngelen duke na thënë keni ecur përpara, jo në Europë, po do kishim arritur edhe Amerikën po të kishim dëgjuar ata. Nuk duhen llogaritur shumë”,- vijoi ai.
