Presidenti Ilir Meta priti sot një grup gazetarësh në institucionin e Presidencës, në kuadër të Ditës Ndërkombëtare për dhënien fund mosndëshkimit të krimeve ndaj gazetarëve.
Gjatë fjalës së tij, Meta u kërkoi të gjithëve që të respektojnë integritetin profesional të gazetarëve dhe kërkoi që ai të mos intimidohet nga askush.
Meta nuk përmendi incidentin e Ramës me gazetarët, ku kryeministri i ofendoi ata në para parlamentit, por duke iu referuar atij, presidenti apeloi për veprimin e institucioneve sa herë ka agresione ndaj gazetarëve, teksa tha:
“Dua të shpreh ndjeshmërinë më të madhe të integritetit profesional dhe u kërkoj të gjithëve të respektojnë atë. Të mos intimidojë askush këtë integritet profesional, apo edhe më rëndë personal, për shkak të profesionit tuaj ndaj të vërtetës dhe nda fakteve, pasi kur deformohet dhe kur cenohet liria dhe të drejtat e gazetarëve është cenuar themeli i sistemit tonë demokratik. Kjo është një dnjeshmëri që e ka e gjithë shoqëria.
Do të apeloja para gjithë institucioneve shtetërore që të veprojmë sa herë ka agresione ndaj gazetarëve. Do jem këtu në mbështetje tuaj, për ata që raportojnë ngjarjet, faktet në mënyrë të menjëhershme, shpesh edhe duke sakrifikuar dhe rrezikuar në shërbim të lirisë, qytetarëve dhe në interes të konsolidimit të gjithë sistemit tonë demokratik.”
Rreth një javë më parë, Rama sulmoi mediet, duke i quajtur të paditur dhe duke i cilësuar pyetjet e tyre si “pyetje idiote”:
“Thërritini mendjes dhe lexoni… Jeni pjesë e një kazani të madh, jeni pjesë e këtij problemi të madh që ka Shqipëria… Për fatkeqësinë tuaj që as lexoni, as kuptoni, as doni të dëgjoni për çfarë bëhet fjalë… Pyetjet tuaja burojnë nga padituria, jeni kaq të paditur… Flisni përçart… Pyetje idiote…”, ishin disa nga ofendimet e kryeministrit, i cili më pas u shpreh se ky ishte opinioni i tij dhe jo ofendim ndaj gazetarëve.
