Në ditën Ndërkombëtare për Dhunën ndaj Grave dhe Vajzave, presidenti Ilir Meta ka një mesazh mjaft të fortë. Meta nënvizon faktin se dhuna fizike e verbale ndaj grave dhe vajzave, është dobësi e jo burrëri. Po kështu ai përsërit qëndrimin e tij, për të mos amnistuar asnjë të dënuar për vepra penale të dhunës në familje.
“Dhuna fizike e verbale ndaj grave dhe vajzave është dobësi! Nuk është burrëri! Është një plagë e shenjë turpi për shoqërinë, një pengesë e madhe për zhvillimin gjithëpërfshirës, të barabartë dhe të qëndrueshëm.
Në Ditën Ndërkombëtare për Eliminimin e Dhunës ndaj Grave dhe Vajzave, i bashkohem fushatës botërore “Ta ngjyrosim botën portokalli”, duke i dhënë sot në mbrëmje këtë ngjyrë Institucionit të Presidencës.
Përsëris qëndrimin tim të palëkundur, për të mos amnistuar asnjë të dënuar për vepra penale të dhunës në familje”.
