Kreu i Partisë së Lirisë, Ilir Meta, iu bën thirrje qytetarëve që të jenë të kujdesshëm dhe të monitorojnë vazhdimisht sahatët nga ndërhyrjet e “patronazhistëve të OSHEE për t’i mbifaturuar”. Me anë të një postimi në rrjetet sociale, ai thotë se rritja e çmimit të energjisë elektrike, do të prekë mijëra familje shqiptare.
“Rritja abuzive e çmimit të energjisë elektrike do të prekë mijëra familje shqiptare. Qytetarëve të thjeshtë që rrezikojnë, sidomos nga vendosja e fashës 800kw në muaj ju bëj thirrje të tregojnë kujdes dhe të monitorojnë vazhdimisht sahatët nga ndërhyrjet e patronazhistëve të OSHEE për t’i mbifaturuar!”, shprehet Meta.
Nga 1 tetori, faturimi i energjisë elektrike nuk do të jetë i njëjtë për të gjithë, si aktualisht me 9.5 lekë për kilovat. Këtë dimër, faturimi do të bëhet me çmim tregu, 42 lekë pa TVSH për çdo kilovat që kalon mbi 800 kwH/muaj. Nën këtë vlerë do paguhet 9.5 lekë/kilovat.
