Zbardhen detajet e sherrit të ndodhur brenda grupit parlamentar demokrat. Dy ditë më parë u ndërmor një nismë për të shkarkuar Rudina Hajdarin nga posti i kryetares, por duket se kemi diçka akoma më të thellë. Sipas burimeve të sigurta të gazetës, deputetët e grupit parlamentar demokrat kanë zhvilluar ditën e enjte një mbledhje për plot 4 orë në Kryesinë e Kuvendit. Mbledhja e deputetëve u bë për të diskutuar për mënyrën se si funksionon grupi parlamentar, por që më pas degradoi në përplasje dhe tensione të ashpra mes tyre. Por burimet i saktësuan gazetës edhe arsyet e vërteta të përplasjes mes deputetëve dhe pse ata kërkojnë largimin e Rudina Hajdarit nga posti i kryetares së grupit parlamentar demokrat. Në sherrin e ndodhur deputetët kanë akuzuar njëri-tjetrin se kjo është një lojë e presidentit Ilir Meta, meqë ky i fundit është në prag shkarkimi. Pala tjetër ka thënë se një pjesë e deputetëve janë kapur nga qeveria dhe se situata në të cilën ndodhen duhet të ndryshojë. Por gjithë këto përplasje të nisura brenda opozitës, dyshohet se është një lojë e stisur nga mbështetësit e presidentit. Një burim pranë grupit demokrat tha se po tentohet përçarja e grupit pikërisht për shkak të ngjarjeve që janë në horizont, shkarkimi i Metës dhe reforma zgjedhore. Gazeta e tha pak ditë më parë se po bëhet një betejë e fortë në prapavijë dhe tashmë u konfirmua. Rudina Hajdari dhe Halit Valteri janë dy individët e vetëm që kanë dalë hapur kundër Metës nga opozita e re. Madje ata janë sulmuar personalisht nga zëdhënësi i presidentit. Pikërisht, tani që po afron shkarkimi i presidentit po tentohet largimi i tyre me qëllim që të shpërbëhet grupi. Dyshohet se e gjitha është lojë e Metës për të shpërbërë grupin.
Reagon grupi demokrat
Por pas përçarjes së grupit parlamentar demokrat, një pjesë e deputetëve përbërës dolën dje në konferencë për shtyp. Deputeti Korab Lita u shpreh se Rudina Hajdari dha dorëheqjen në mënyrë verbale përball deputetëve të tjerë të grupit, duke shtuar se më pas u propozuan 3 kandidatura për të drejtuar grupin parlamentar demokrat. “Në datën 10 tetor 2019 është zhvilluar mbledhja e grupit parlamentar ku është diskutuar edhe për funksionimin e grupit parlamentar, ku pasi janë bërë prezent të gjitha problemet, i është kërkuar zonjës Hajdari që të tërhiqet nga drejtimi i grupit dhe të vazhdojë me detyrat e tjera të rëndësishme. Pas bërjes prezente të shpërdorimit të besimit tonë prej 6 muajsh si në aspektin organizativ, politik dhe ligjor, zonja Hajdari në mënyrë verbale deklaroi dorëheqjen e saj. Pas këtij momenti, grupi kaloi në procesin zgjedhor për zgjedhjen e kryetarit të tij. U propozuan tre kandidatura, Alban Zeneli, Halit Valteri dhe Korab Lita. Zoti Zeneli u tërhoq nga gara dhe mbetën dy kandidatura. Zoti Valteri kërkoi kohë për të takuar kohë për t’u takuar me kolegët për qëllim lobimin për vota. Pasi nuk gjeti mbështetje, zoti Valteri deklaroi se tërhiqet dhe më mbështet mua në këtë garë. Për këtë u votua në mënyrë të hapur dhe u firmos nga të gjithë në unanimitet”, u shpreh deputeti Korab Lita.
Reagon Alban Zeneli
Por në krah të deputetit Korab Lita ka dalë edhe Alban Zeneli. Në një reagim për media, ai konfirmoi mbledhjen e grupit ku është marrë vendimi, duke shtuar se ka zgjatur 4 orë dhe se Hajdari ka qenë vetë e pranishme. I pyetur nëse i druhet një shkrirje të grupit, ai e mohoi duke thënë se për këtë çështje ndihet shumë i qetë. “Vendimi është marrë ditën e enjte me pjesëmarrjen e të gjithë grupit tonë që është e përbërë prej 9 anëtarësh. Në fund të mbledhjes dolëm në vendim që të dalin edhe kandidatura të tjera për të kandiduar për postin e kryetarit për grupin, ku një ndër kandidaturat isha dhe unë. Një nga arsyet kryesore ishte menaxhimi i grupit nga ana administrative dhe organizative po çalonte. Absolutisht nuk i druhem një shkrirje të grupit, jam shumë i qetë. Ne ishim në një mbledhje maratonë prej plot 4 orësh”, u shpreh deputeti Alban Zeneli. /Gazeta SOT
