Kreu i shtetit, Ilir Meta pohoi se nuk ka afat kushtetues për Presidentin, sa i përket kohës që duhet për të zgjedhur kandidatët për anëtarë në Gjykatën Kushtetuese.
Gjatë një konference për shtyp, Meta ka lëshuar akuza ndaj Këshillit të Emërimeve në Drejtësi, në veçanti ndaj kryetarit të këtij institucioni, Ardian Dvoranit. Teksa e konsideroi absurde, të turpshme dhe mafioze, mosndjekjen e radhës në përzgjedhjen e anëtarëve të Kushtetueses nga KED.
Ndërsa ka sqaruar vendimin për dekretimin e Marsida Xhaferllarit, si anëtare të Gjykatës Kushtetuese.
“Duhet të keni të qartë ju si gazetar dhe çdo qytetar se nuk ka një afat të caktuar në Kushtetutë për Presidentin e Republikës. Ka një afat për Parlamentin sepse dihet që është një institucion kolegjial por nuk kemi një afat për Presidentin.
E dyta, Kushtetuta është mbi çdo gjë. Për herë të parë krijohet Gjykata Kushtetuese sipas reformës dhe është tepër e rëndësishme që të respektohet Kushtetuta aq më tepër Gjykata Kushtetuese.
Çdo akt në këtë proces i Presidentit, i Parlamentit dhe institucioneve të përfshira është historik sepse do mbetet si referencë në të ardhmen. Çdo veprim do të jetë precedent për të ardhmen. Duhet të kemi të qartë të Komisioni i Emërimeve në Drejtësi është një institucion i cili merret vetëm me menaxhimin administrativ për të garantuar zbatimin e Kushtetutës.
Kushtetuta tregon qartë se si krijohet Gjykata Kushtetuese. Presidenti ka të drejtën për vakancën e parë, pastaj është parlamenti dhe në këtë mënyrë përsëritet e njëjta renditje dhe në këtë plan është detyra e KED-së që të rregullojë listat e vakancave dhe të afateve, që të respektohet Kushtetuta për mënyrën e ndërtimit të gjykatës dhe të mos kemi përplasje. Kryetari i KED të bëjë lojëra me karakter administrativ në mënyrë mafioze, që të vendosë presidentin në këtë pozitë, kreun e shtetit, ose të shkelë Kushtetutën”, deklaroi Meta.
