Nga takimi i radhës elektoral, presidenti i zgjedhur, Ilir Meta, theksoi se kryeministri Rama dhe kryedemokrati Basha janë bashkuar në një front. Sipas tij, ata e nisën me çadrën e lirisë dhe kanë përfunduar në atë të oligarkëve.
Duke marrë parasysh sulmet që po i bëhen nga Rama dhe Basha përgjatë kësaj fushate, Meta vuri në dukje se këto nuk janë veçse veprime diletantësh dhe përbaltje ndaj asaj që përfaqëson LSI.
Nga qyteti i Lushnjës, Meta vuri në dukje se dy partitë kryesore përbëjnë simbolin e antipolitikës, kur përmendi rastin e përzgjedhjes së listës së Partisë Demokratike nga ana e kryetarit Basha, i cili la jashtë kandidimit emra si Jozefina Topalli dhe Majlinda Bregu.
“LSI forcë e parë për të gjitha nënat dhe gratë e Shqipërisë që u çmendën nga politikanët e çadrave, që e nisin tek çadra e lirisë dhe e mbyllin tek çadra e oligarkisë. LSI forcë e parë për vajzat e djemtë tuaj këtu në Lushnjë dhe në gjithë Shqipërinë që të kenë një të ardhme të sigurt. Kjo e ardhme e sigurt kërkon LSI-në forcë të parë që ul taksa dhe hap vende pune. Një drejtim të ri, me vizion të mençur. Diletantët po na godasin dhe po përbaltin LSI-së. LSI do të votohet edhe nga ata që re shohin këtë forcë politike si shtyllën e stabilitetit të Shqipërisë. LSI ka një mesazh gjithëpërfshirës. LSI nuk i largon gratë e shquara nga listat natën edhe në errësirë, por ua besojmë atë që të drejtojnë listën tonë”, u shpreh Meta.
