Presidenti i Republikës, Ilir Meta zhvilloi një takim me Ministrin e Punëve të Jashtme të Maqedonisë së Veriut, Bujar Osmani.
Meta u shpreh se marrëdhëniet mes dy vendeve tona duhen të forcohen edhe më tej në dobi të paqes, stabilitetit dhe zhvillimit të rajonit.
Sipas kreut të shtetit, roli aktiv i shqiptarëve në institucionet maqedonase është provë e mbështetjes për projektin euroatlantik.
Postimi i Metës në rrjetin social, Facebook
Prita sot në një takim të përzemërt Ministrin e Punëve të Jashtme të Maqedonisë së Veriut, z.Bujar Osmani.
Kënaqësi të vlerësonim rëndësinë e marrëdhënieve shumë të mira të fqinjësisë mes dy vendeve tona, aleate në NATO dhe me vizione të përbashkëta euroatlantike, që duhen të forcohen edhe më tej në dobi të paqes, stabilitetit dhe zhvillimit të rajonit.
Theksova rëndësinë e rritjes së mëtejshme të bashkëpunimin ekonomik e tregtar dhe pjesëmarrjes në projekte dypalëshe e rajonale, veçanërisht në interes të qytetarëve të zonave ndërkufitare.
Pjesëmarrja dhe roli aktiv i faktorit shqiptar në institucionet e Maqedonisë së Veriut, është provë e qëndrimit të tyre të palëkundur në mbështetje të projektit euroatlantik dhe të reformave të rëndësishme për ndërtimin e shtetit multi-etnik.
