Presidenti i Republikës Ilir Meta në takimin e sotëm që pati me grupin e deputetëve britanikë, anëtarë të Grupit të Unionit Ndër-parlamentar dhe të Miqësisë Mbretëri e Bashkuar-Shqipëri, ka mbajtur në qendër të bisedimeve nevojat për nxitjen e mëtejshme të bashkëpunimit dypalësh, veçanërisht të bashkëpunimit ekonomik dhe tregtar.
Presidenti Meta shprehu mirënjohje për mbështëtjën dhe vlerësoi partneritetin që Mbretëria e Bashkuar ka dhënë për konsolidimin e demokracisë dhe zbatimit të ligjit në Shqipëri.
Në mënyrë të veçantë Presidenti Meta vlerësoi rolin e deputetëve britanikë për promovimin e Shqipërisë, si dhe theksoi nevojën e nxitjes së mëtejshme të bashkëpunimit dypalësh, veçanërisht të atij ekonomik e tregtar.
Presidenti Meta tha se kishte besim të plotë tek të rinjtë që kanë kryer studime në Mbretërinë e Bashkuar dhe do të integrohen më mirë në të gjitha nivelet që të shërbejnë si katalizatorë të bashkëpunimit më të thelluar dypalësh.
Duke iu referuar bashkëpunimit për çështjet e sigurisë dhe sfidat e përbashkëta në këtë drejtim, Presidenti Meta, theksoi rëndësinë e bashkëpunimit më të ngushtë në drejtim të luftës kundër krimit të organizuar dhe trafiqeve të qenieve njerëzore në të ardhmen.
Presidenti Meta shprehu gjithashtu besimin se, edhe në kuadrin e Samitit të ardhshëm të Londrës për Ballkanin Perëndimor, deputetët britanikë do të vijojnë të kontribuojnë për ruajtjen e vëmendjes së Mbretërisë së Bashkuar ndaj Shqipërisë dhe rajonit të Ballkanit Perëndimor.
Deputetët britanikë e siguruan Presidentin Meta se Mbretëria e Bashkuar është shumë e angazhuar për ta forcuar bashkëpunimin me Shqipërinë dhe rajonin e Ballkanit Perëndimor, si në aspektin dypalësh ashtu edhe në kuadër të NATO-s dhe BE-së.
