Ashtu siç ishte lajmëruar edhe më herët, presidenti Ilir Meta priti në një takim sot ekspertët e dërguar nga Komisioni i Venecias. Gjatë takimit ai i ka njohur ata me argumentet ligjorë dhe kushtetues mbi të cilin ka bazuar kthimin për rishqyrtim të paketës “Anti-Shpifje”.
Sipas presidentit, kjo paketë ligjore dëmton liritë themelore dhe për më tepër shkel kushtetutën në parime. Ai ka vënë në dukje rëndësinë e lirisë së shprehjes dhe të shtypit. Sipas tij, mazhoranca po përpiqet të kontrollojë mediat e lira me anë të kësaj pakete.
“Liria e shprehjes, liria e medias dhe e drejta e informimit, përveç se janë të drejta themelore kushtetuese, janë të lidhura ngushtë me parimin e ndërtimit dhe funksionimit të një shteti demokratik.
Pavarësia e pushtetit të medias është thelbi i funksionimit dhe mbarëvajtjes së shtetit të së drejtës. Nëse cenohet liria e shprehjes dhe e shtypit, dhe media vendoset nën kontroll politik, atëherë është cenuar dhe rendi i lirë dhe kushtetues, me pasoja direkte dhe shumë të rënda për të ardhmen evropiane të Shqipërisë.
Çdo nisëm ligjore që cenon të drejtën e fjalës së lirë, nuk është gjë tjetër vetëm një shkelje e hapur e gjithë parimeve kushtetuese demokratike. Hyrja në fuqi e ndryshimeve ligjore të miratuara nga qeveria do të përkeqësonte besueshmërinë e Shqipërisë, si një vend demokratik dhe i shtetit të së drejtës, si dhe të cenonte drejtpërdrejt procesin e integrimit të shpejtë të vendit në Evropën e Bashkuar”.
